اپرکوہستان سے گلگت جانے والی کار خوفناک حادثے کا شکار


ہزارہ ڈویژن کے ضلع اپرکوہستان میں کار گہری کھائی میں جاگری، حادثے میں ایک ہی خاندان کے 6 افراد لقمہ اجل بن گئے۔

تفصیلات کے مطابق ضلع اپر کوہستان میں لوٹر کے قریب کار ڈرائیور سے بے قابو ہوکر سینکڑوں فٹ گہری کھائی میں جاگری، دلخراش حادثے میں گاڑی میں سوار تمام افراد جاں بحق ہوگئے۔

جاں بحق ہونے والوں میں بچوں سمیت دو خواتین بھی شامل تھیں، بدقسمت کار اپر کوہستان سے گلگت جارہی تھی۔

افسوسناک واقعے کی اطلاع ملتے ہی مقامی افراد کی بڑی تعداد اور پولیس جائے حادثے پر پہنچی ، اور انہوں نے دشوار گزار راستوں سے گزر کر لاشوں کو نکال کر شتیال اسپتال منتقل کیا۔

واضح رہے کہ اپر کوہستان میں آئے روز ٹریفک حادثات رونما ہوتے رہتے ہیں، جس کے باعث قیمتی جانوں کا ضیاع ہوتا ہے۔

رواں سال ستمبر میں شاہراہِ قراقرم پر برسین اور داسو کے درمیان مسافر وین لینڈ سلائیڈنگ کی زد میں آگئی تھی۔

مئی میں کیرو کے قریب اس وقت حادثہ پیش آیا جب ایمبولینس میں بزرگ کی لاش کو سوات منتقل کیا جارہا تھا کہ پھسلن کے باعث وہ گہری کھائی میں جا گری، دلخراش واقعے کے نتیجے میں خاتون سمیت آٹھ افرادجاں بحق ہوئے تھے۔