جانیئے اسد عمر کو ایسا کیوں لگا کہ دنانیر مبین (پاؤری گرل) کو سیاست میں ہونا چاہیے؟


نجی ٹی وی چینل کے پروگرام میں بطور مہمان شرکت کے دوران دنانیر مبین نے بتایا کہ وہ کرکٹ کھیلنا بہت پسند کرتی ہیں اور آؤٹ ہونے پر بھی اپنی ہار تسلیم نہیں کرتی تھیں جس پر پروگرام میں شریک وفاقی وزیر نے کہا کہ ان کو تو سیاست میں ہونا چاہیے۔

مختصر ویڈیو سے شہرت کی بلندیوں کو چھونے والی سوشل میڈیا انفلوئنسر دنانیر مبین المعروف (پاؤری گرل) جو کہ پی ایس ایل کے دوران پشاور زلمی کی برانڈ ایمبسڈر بھی ہیں انہوں نے بتایا کہ انہیں کرکٹ بہت پسند ہے اور وہ بچپن سے ہی اپنے کزنز کے ساتھ کرکٹ کھیلا کرتی تھیں۔

پروگرام کے میزبان شہزاداقبال نے جب ان سے پوچھا کہ کیا وہ آؤٹ ہونے کی صورت میں ہار تسلیم کرتی تھیں یا پھر بلا چھین کا بھاگ جایا کرتی تھیں تو انہوں نے جواب دیا کہ وہ اپنی ہار کو کبھی تسلیم نہیں کرتی تھیں۔


دنانیر مبین کے اس جواب پر پروگرام میں بطور مہمان شرکت کرنے والے وفاقی وزیر منصوبہ بندی اسدعمر نے کہا کہ ان کا مستقبل تو سیاست میں ہے۔

دنانیر سے متاثر ہوتے ہوئے وفاقی وزیر اسد عمر بھی اس مقبول ترین پاؤری ٹرینڈ کا حصہ بن گئے اور اُنہوں نے بھی اپنے منفرد انداز میں تین جملے کہہ دیئے کہ “یہ میں ہوں، یہ جیو کا سیٹ ہے اور یہ ہماری پاوری ہورہی ہے”۔

یاد رہے کہ دنانیر مبین نے سوشل میڈیا پر اپنی شیئر کی گئی ایک مختصر ویڈیو سے اس وقت شہرت حاصل کی جب اس پر بھارتی میوزک پروڈیوسر نے ریپ سانگ تخلیق کیا اور اس کے بعد یہ ویڈیو زبان زد عام ہو گئی اور لالی ووڈ،بالی ووڈ حتیٰ کہ ہالی ووڈ کے فنکاروں نے بھی اس پر اپنی ویڈیوز بنا کر سوشل میڈیا پر شیئر کی ہیں۔