وفاقی وزیر برائے داخلہ شیخ رشید احمد کا نادرا کے ہیڈ کوارٹر کے دورہ کے موقع پر میڈیا سے گفتگو کرتے ہوئے کہنا تھا کہ نادرا ایک بہت ہی حساس ادارہ ہے اور اپنا کام بہت اچھے طریقے سے کر رہا ہے، اپنے دورے کے دوران میں نے ہدایت کی ہے کہ نادرا ہیڈ کوارٹرز اتوار کو بھی کھلا رکھا جائے، اسکے علاوہ 50 نئے نادرا سنٹرز 24 گھنٹے کھلے رہیں گے اور تمام تحصیل ہیڈکوارٹرز میں نادرا کے دفاتر کا قیام ہر صورت یقینی بنایا جائے گا۔
وزیر داخلہ شیخ رشید احمد کا کہنا تھا کہ حکومت نے اس بات کا فیصلہ کیا ہے کہ اب ہر شہری کو پہلا شناختی کارڈ بلکل مفت اور چالیس دن کے بجائے پندرہ دن میں فراہم کر دیا جائے گا، انہوں نے کہا کہ وزارت خارجہ سے تعاون حاصل کرکے ہر سفارت خانے اور پاکستانی مشن میں پاسپورٹ اور شناختی کارڈ کے اجراء کے لئے دفاتر کھولے جائیں گے۔
شیخ رشید کا کہنا تھا کہ سمندر پار پاکستانیوں کے مسائل سے بھی اچھی طرح سے واقف ہیں تاہم اگلے دو ماہ کے درمیان سمندر پار پاکستانیوں کے مسائل کے حل میں اہم پیش رفت نظر آئے گی، اس وقت پوری کوشش کر رہے ہیں کہ سمندر پار پاکستانیوں کے پاسپورٹ، آئی ڈی کارڈز کے اجراء سمیت دیگر مسائل ایک ہی چھت تلے حل ہو جائیں۔
انہوں نے کہا کہ اس وقت صرف 10 نادرا دفاتر چوبیس گھنٹے اور سات دن کام کر رہےہیں، ان کی تعداد بڑھا کر 50 کی جائے گی، اسی طرح موبائل وینز کی تعداد 200 سے بڑھا کر 300 کی جائے گی تاکہ دور دراز اور پسماندہ علاقوں کے عوام کو بھی سہولیات فراہم ہو سکیں، انہوں نے کہا کہ نادرا میں تین ہزار کے قریب کنٹریکٹ ملازمین ہیں اور کسی کنٹریکٹ ملازم کو فارغ نہیں کیا جائے گا۔
