شہباز شریف اور حمزہ شہباز کی حفاظتی ضمانت منظور


لاہور کی بنکنگ جراٸم کورٹ نے شوگر انکواٸری منی لانڈرنگ کیس میں ایف آٸی اے کو چالان واپس کر دیا۔ عدالت نے سات روز کے لیے شہباز شریف اور حمزہ شہباز کی حفاظتی ضمانت منظور کرلی۔

تفصیلات کے مطابق بنکنگ جرائم کورٹ کے جج راٸے طاہر صابر نے ایف آئی اے کی جانب سے دائر عدالتی دائرہ اختیار پر کیس کی سماعت کی۔

حمزہ شہباز نے عدالت کے روبرو پیش ہوکر حاضری مکمل کروائی، شہباز شریف اسلام آباد میں ہونے کی وجہ سے پیش نہ ہوٸے۔

عدالت نے داٸرہ اختیار پر فیصلہ سناتے ہوٸے شہباز شریف اور حمزہ شہباز کے خلاف دائر چالان ایف آئی اے کو واپس کردیا اور سات روز میں متعلقہ عدالت میں جمع کروانے کا حکم دیا۔

عدالت نے شہباز شریف اور حمزہ شہباز کی حفاظتی ضمانت بھی سات روزہ تک منظور کرلی اور حکم دیا کہ ایف آئی اے جہاں چالان جمع کروائے وہاں سے عبوری ضمانت کے لیے رجوع کیا جاٸے۔

ایف آٸی اے کا مؤقف تھا کہ بنکنگ کورٹ کو مقدمے کی سماعت کا اختیار نہیں لہٰذا اسے متعلقہ عدالت کو بھجوایا جاٸے۔

قبل ازیں بینکنگ جرائم کورٹ میں شہباز شریف اور حمزہ شہباز کے خلاف شوگر مل کے ذریعے منی لانڈرنگ کیس کی سماعت کے موقع پر عدالت نے شہبازشریف کی حاضری معافی درخواست منظور کرلی۔