پاکستان میں یومیہ کورونا کیسز میں تیزی سے کمی، 31 اموات ریکارڈ


اسلام آباد : پاکستان میں کورونا کے مریضوں میں کمی کا سلسلہ جاری ہے اور مثبت کیسزکی شرح3 فیصد پر آگئی۔

تفصیلات کے مطابق نیشنل کمانڈ اینڈ آپریشن سینٹر نے ملک میں جاری کورونا وبا کے تازہ ترین اعدادو شمار جاری کردیئے ، جس میں بتایا گیا ہے کہ ملک میں 24 گھنٹے میں کورونا سے مزید 31 مریض جاں بحق ہوگئے ، جس کے بعد کورونا سے اموات کی تعداد 30ہزار سے تجاوز کرگئی۔

این سی اوسی کا کہنا ہے کہ چوبیس گھنٹے میں کورونا کے 41ہزار597 ٹیسٹ کیے گئے، جس میں مزید ایک ہزار360 میں کورونا کی تصدیق ہوئی ، اس دوران ملک میں کورونا کے کیسز مثبت آنے کی شرح 3.26 فیصد پر آگئی۔

نیشنل کمانڈ ایںڈ آپریشن سینٹر نے بتایا کہ ملک میں کورونا کے1 ہزار 302 مریض انتہائی نگہداشت میں زیرعلاج ہیں جبکہ ملک بھر میں کورونا سے متاثر ہونے والوں کی مجموعی تعداد 15 لاکھ ایک ہزار 680 تک پہنچ گئی ہے۔

اعداد و شمار کے مطابق سندھ میں کورونا کیسز کی تعداد پانچ لاکھ 64 ہزار 522 ، پنجاب میں 4 لاکھ 99 ہزار 063 ، خیبرپختونخوا میں 2 لاکھ 14 ہزار 955 اور بلوچستان میں 35 ہزار 274 ہے جبکہ اسلام آباد میں ایک لاکھ 33 ہزار 839، گلگت بلتستان میں 11 ہزار358 اور آزاد کشمیر میں 42 ہزار669 کیسز سامنے آچکے ہیں۔