پی آئی اے کی سعودی عرب کیلئے 18 پروازیں منسوخ

سعودی حکومت کا انٹرنیشنل پروازوں پر پابندی کا نوٹیفیکیشن، پی آئی اے کی بھی آج کی 18 پروازیں منسوخ

کورونا وائرس کی وبا کے دوبارہ پھیلنے کے خدشے اور پھیلاؤ کو روکنے کے پیش نظر سعودی سول ایوی ایشن کی جانب سے انٹرنیشنل پروازوں پر پابندی عائد کر دی گئی ہے جس کے تحت بیرون ملک سے سعودی عرب آنے والی مسافر پروازوں پر فوری طور پر پابندی عائد کر دی گئی۔

سعودی سول ایوی ایشن کے مطابق اس پابندی کا اطلاق ابتدائی طور پر ایک ہفتے کے لیے کیا جا رہا ہے مگر صورتحال کے پیش نظر اس میں مزید ایک ہفتے کی توسیع کی جا سکتی ہے۔ پابندی کا اطلاق کارگو پرواز کے علاوہ ہر قسم کی فضائی پرواز جن میں مسافر طیارے اور چارٹر طیارے بھی شامل ہیں پر ہوگا۔

ترجمان قومی ایئر لائن کے مطابق 21 دسمبر کے شیڈول 18 پروازوں کو سعودی اعلامیے کے بعد منسوخ کر دیا گیا ہے۔ ترجمان نے کہا کہ لاہور سے جدہ اور جدہ سے لاہور، اسلام آباد سے دمام اور دمام سے اسلام آباد، کراچی سے مدینہ اور مدینہ سے کراچی کی تمام پروازیں منسوخ کر دی گئیں ہیں۔

ترجمان کے مطابق لاہور سے مدینہ اور مدینہ سے لاہور اور مدینہ سے کراچی مدینہ سے ملتان اور مدینہ سے ملتان اور پھر کراچی پہنچنے والی پروازوں کو منسوخ کر دیا گیا ہے۔ ان کا یہ بھی کہنا تھا کہ سعودی حکومت کی جانب سے بین الاقوامی پروازوں پر پابندی کی بحالی کا نوٹیفکیشن دوبارہ جاری ہونے تک پابندی کا اطلاق رہے گا۔

مسافر پروازوں کی منسوخی اور آئندہ شیڈول سفر کی معلومات کے لیے پی آئی کے یو اے این ہیلپ لائن نمبر 786 786 111 (021) پر رابطہ کر سکتے ہیں۔ ترجمان پی آئی نے کہا کہ متاثرہ مسافروں کو پروازیں بحال ہوتے ہی پروازوں پر ایڈجسٹ کیا جائے گا۔