کراچی کے مختلف علاقوں میں تیزہواؤں کے ساتھ بارش ، جاتی سردی لوٹ آئی


کراچی : شہر قائد کے مختلف علاقوں میں تیزہواؤں کے ساتھ بارش سے جاتی سردی لوٹ آئی اور موسم خوشگوار ہوگیا، چیف میٹرولوجسٹ کا کہنا ہے کہ آج شام تک مطلع صاف ہونے کا امکان ہے۔

تفصیلات کے مطابق محکمہ موسمیات کی پیش گوئی پھر غلط نکلی ، کراچی کے مختلف علاقوں میں بادل خوب برسے اور تیز ہواؤں کے ساتھ بارش ہوئی۔

ڈیفنس،صدر، اولڈسٹی ایریا،لیاری،سائٹ ایریا، بلدیہ، اورنگی،صدر،ملیر،لیاقت آباد ، سہراب گوٹھ،نارتھ کراچی،بفرزون،سرجانی،نارتھ ناظم آباد گڈاپ اورگلشن معمار میں گھٹائیں خوب برسیں۔

بارش کے بعد شاہراہوں پر پانی جمع ہوگیا، جس کے باعث ٹریفک کی آمدورفت متاثر ہوئی اور سڑکوں پر پھسلن سے متعدد موٹرسائیکلوں کو حادثہ پیش آیاجس سے کئی افراد زخمی ہوئے۔

بارش ہوتے ہی شہر کے مختلف علاقوں میں بجلی کی فراہمی بند ہوگئی ، متاثرہ علاقوں میں نارتھ کراچی،سر سید ٹاؤن ،بفرزون ،لیاقت آباد ، شاہ فیصل کالونی، جیکب لائنز، منگھو پیر، پاک کالونی ، ملیر،کورنگی،اورنگی ،لانڈھی اورسرجانی شامل ہیں۔

چیف میٹرولوجسٹ سردار سرفراز کا کہنا ہے کہ مختلف علاقوں میں کہیں بوندا باندی اور کہیں ہلکی بارش کاامکان ہے تاہم شام تک مطلع صاف ہوجائے گا۔

سردار سرفراز نے بتایا صبح کےاوقات میں مختلف علاقوں میں بوندا باندی ریکارڈ ہوئی لیکن شہر میں تیز بارش کا کوئی امکان نہیں۔