گھی اور آئل کی قیمتوں میں اضافہ : اٹارنی جنرل کو نوٹس جاری


اسلام آباد : گھی اور کوکنگ آئل کی قیمتوں میں اضافہ سے متعلق کیس میں سپریم کورٹ نے اٹارنی جنرل کو نوٹس جاری کرکے تحریری گزارشات طلب کرلیں۔

تفصیلات کے مطابق سپریم کورٹ میں نامزد چیف جسٹس عمرعطا بندیال کی سربراہی میں تین رکنی بینچ نے گھی اور کوکنگ آئل کی قیمتوں میں اضافہ سے متعلق کیس کی سماعت کی۔

اس موقع پر فاضل عدالت نے مسابقی کمیشن اور متعلقہ فریقین کو بھی اپنی اپنی گزارشات جمع کروانے کی ہدایات جاری کی۔

اٹارنی جنرل نے عدالت کو بتایا کہ ریگولیٹرز کے اختیارات سے متعلق یہ بڑا اہم کیس ہے، گھی کوکنگ آئل کی قیمتوں میں اضافہ پر مسابقتی کمیشن نے کمپنی مالکان کو نوٹسز جاری کیے ہیں۔

اٹارنی جنرل کے مطابق کمیشن کے نوٹس کے خلاف ایک کمپنی رٹ میں چلی گئی، تمام ریگولیٹری باڈیز کے اختیارات سے متعلق سپریم کورٹ گائیڈ لائین سیٹ کرے جس میں کمپنی مالکان،صارفین کے حقوق کا تحفظ ہو۔

ان کا مزید کہنا تھا کہ گائیڈ لائین میں ریگولیٹرز اور عدالتی اختیارات کو واضع کیا جائے، ریگولیٹرز کے فیصلوں کیخلاف مقدمہ بازی سے ریونیوز بھی رک جاتا ہے۔

عدالت نے اٹارنی جنرل کا بیان سن کر ان کی استدعا منظور کرلی، بعد ازاں نامزد چیف جسٹس عمر عطا بندیال کی سربراہی میں تین رکنی بینچ نے سماعت مارچ تک ملتوی کردی۔